Fundur VG: Félagshyggjustjórnin megi ekki stranda á Icesave

Það var þétt setinn bekkurinn á félagsfundi Vinstri grænna í Kraganum í kvöld, en aðstandendur fundarins telja að yfir hundrað manns hafi setið fundinn. Meðal gesta var stór hluti þingflokks Vinstri grænna og jafnvel flokksmeðlimir úr öðrum kjördæmum.

Mál málanna á fundinum var, líkt og nærri mátti geta, frumvarp ríkisstjórnarinnar um Icesave, en meðal þeirra sem sátu fyrir svörum á fundinum voru þingmennirnir Guðfríður Lilja Grétarsdóttir og Ögmundur Jónasson, sem talað hefur fyrir fyrirvörum við samninginn.

Að sögn Gests Svavarssonar, fundarstjóra, mátti sjá allt Icesave-skoðanalitrófið meðal gesta fundarins og var málið rætt fram og til baka.

Sumir töldu samningstregðu Ögmundar og Guðfríðar óábyrga, meðan aðrir lýstu stuðningi við fyrirvara við samninginn.

Gestur segir að þó ekki sé hægt að tala um niðurstöðu af fundinum, hafi þingmenn flokksins örugglega fundið fyrir þrýstingi um að málið yrði klárað á farsælan hátt.

„Allir voru sammála um það að stefna bæri að því að hafa hér félagshyggjustjórn næstu árin og hún mætti ekki stranda á þessu," segir Gestur.

Á fundinum voru aðildarviðræður við Evrópusambandið einnig ræddar, svo og samfélagsmál og frysting eigna auðmanna.