Alfreð sló Dag út úr bikarnum - Rhein Neckar Lowen vann í framlengingu

Kiel, lið Alfreðs Gíslasonar, sló lærisveina Dags Sigurðssonar í Füchse Berlin út úr þýska bikarnum í handbolta í kvöld þegar liðið vann átta marka sigur, 34-26, í leik liðanna í Kiel. Kiel var 17-11 yfir í hálfleik.

Aron Pálmarsson skoraði eitt mark fyir Kiel en markahæsti maður liðsins var Momir Ilic með sjö mörk. Rúnar Kárason skoraði 2 mörk fyrir Füchse Berlin en markahæsti leikmaður liðsins var Norðmaðurinn Kjetil Strand með 10 mörk.

Rhein Neckar Lowen vann 33-31 útisigur á TV Bittenfeld eftir framlengdan leik en staðan var 27-27 eftir venjulegan leiktíma. TV Bittenfeld var 17-9 yfir í hálfleik en Rhein Neckar Lowen liðið kom til baka og Ólafur Stefánsson tryggði sínum mönnum framlengingu á vítalínunni þegar leiktíminn var runninn út.

Ólafur Stefánsson og Guðjón Valur Sigurðsson skoruðu báðir fimm mörk fyrir Rhein Neckar Lowen en Snorri Steinn Guðjónsson komst ekki á blað og klúðraði eina vítakasti sínu.