Dæmd til að láta syni sína af hendi

Íslensk tveggja barna móðir er dæmd til að afhenda fyrrverandi eiginmanni sínum í Bandaríkjunum syni sína tvo samkvæmt nýlegum dómi Hæstaréttar. Konan er hvorki með fjármagn til upphalds né landvistar-og atvinnuleyfi þar í landi. Allls staðar segist hún koma að lokuðum dyrum í íslensku stjórnkerfi.

Borghildur Guðmundssdóttir flutti hingað til lands í janúar í fyrra með syni sína tvo sem hún á með bandarískum manni.

Eiginmaður hennar fyrrverandi fór í mál við hana og krafðist þess með aðfarabeiðni að hún myndi afhenda honum synina.

Í úrskurði Héraðsdóms Reykjavíkur sem féll í júlí síðastliðnum segir að Borghildur hafi flutt drengina tvo til Íslands frá Bandaríkjunum og haldið þeim hér á landi með ólögmætum hætti samkvæmt ákvæðum Haag samningsins. Hæstiréttur staðfesti úrskurð héraðsdóms.

Borghildur segist hvorki vera með atvinnu-né landvistarleyfi í Bandaríkjunum. Hún hafi í engin hús að venda þar í landi. Hún starfi í Reykjanesbæ við heimaþjónustu og hafi litla sem enga fjármuni til framfærslu flytjist hún út.

Ennfremur blasir við henni forsjármál í Bandaríkjunum en Borghildur segist ekki hafa neina möguleika á lögfræðingi, þar sem hún hafi ekki peninga til.

Drengirnir tveir sem eru 10 og fimm ára séu hér í skóla og leikskóla og uni sér vel.

Hún segist allsstaðar hafa komið að lokuðum dyrum í íslensku stjórnkerfi og lítið sé hægt að gera fyrir hana.

Stofnaður hefur verið hópur á Facebook sem ber yfirskriftina Hjálpum Boggu að halda börnum sínum þar sem gefið er upp reikningsnúmer fyrir þá sem vilja styrkja Borghildi.

Nánar verður rætt við Borghildi í kvöldfréttum Stöðvar 2 klukkan 18:30.