Eignamat frestast enn

Fjármálaeftirlitið hefur enn seinkað mati á eignum og skuldbindingum nýju bankanna þriggja, og ætlar að ákveða í síðasta lagi um miðjan næsta mánuð hvenær því á að ljúka.

Eftirlitið taldi sig upphaflega þurfa 30 daga til að ljúka matinu en síðan var fresturinn lengdur í 90 daga frá hruni. Eftirlitið birti í byrjun vikunnar auglýsingu í Lögbirtingablaðinu þar sem fram kemur að málið hafi reynst viðameira en ætlað var. „Jafnframt tók talsverðan tíma að ljúka ráðningu óháðs matsaðila og hófst matsvinnan sjálf því seinna en áformað var," segir í auglýsingu eftirlitsins.

Fjármálaeftirlitið segir enn óvíst hversu langan frest þurfi til að ljúka mati á eignum og skuldbindingum nýju bankanna en hyggst taka ákvörðun um dagsetningu í síðasta lagi 15. febrúar. - ikh