Hollusta við áætlun AGS skiptir sköpum fyrir lánshæfismat

Að mati Fitch Ratings mun hollusta nýrra stjórnvalda á Íslandi við aðgerðaáætlun Alþjóðagjaldeyrissjóðsins (AGS) ráða mestu um framtíð lánshæfismats ríkissjóðs í bókum matsfyrirtækisins næsta kastið.

Greining Glitnis fjallar um málið í Morgunkorni sínu. Þar segir að lánshæfiseinkunn ríkissjóðs hjá Fitch fyrir skuldbindingar í erlendri mynt séu nú BBB- og eru á neikvæðum horfum. Fitch, líkt og hin matsfyrirtækin sem meta lánshæfi ríkissjóðs, hefur hríðlækkað lánshæfismat ríkisjóðs í kjölfar bankahrunsins í október.

Paul Rawkins sérfræðingur hjá Fitch sagði í viðtali við Reuters að ef aðgerðaáætlun AGS og íslenskra stjórnvalda myndi komast í uppnám yrðu afleiðingarnar hrikalegar. Rawkins sagði jafnframt að pólitískur óstöðugleiki væri ekki af hinu góða og gæti aukið líkurnar á frekari lækkun lánshæfismats ríkisjóðs.

Þessar ábendingar frá Fitch er áþekkar því sem Kenneth Orchard sérfræðingur Moody´s sagði í síðustu viku en þá benti hann á mikilvægi þess að Ísland myndi halda sig við aðgerðaáætlun AGS. Þá sagði Orchard að núna væri mikilvægara en nokkru sinni fyrr að Ísland myndi tryggja stöðu sína í alþjóðasamfélaginu og viðhalda góðum samskiptum við aðrar þjóðir.