Líf í höfnum landsins

Ólína Þorvarðadóttir, þingmaður Samfylkingarinnar, segir reynslu af lögum um strandveiðar sem tóku gildi í vor vera góða. Mun meiri umsvif væri í höfnum landsins og að landanir væru fleiri en áður.

Illugi Gunnarsson, þingmaður Sjálfstæðisflokksins, vakti máls á strandveiðikerfinu í upphafi þingfundar í dag. Hann sagði ljóst að breytingarnar hefðu ekki aukið aflaverðmæti og að spá sjálfstæðismanna um að nýjum bátum myndi fjölga umtalsvert hefði ræst. Illugi fullyrti jafnframt að þeim muni fjölga ennfrekar á næstu árum sem muni leiða til þess að veiðidögum muni fækka og þannig muni draga úr hagkvæmni.

Ólína sagði að miðað við orð Illuga væri ljóst að hægt væri að horfa á sama hlutinn á ólíkan hátt. Hún benti á að reynslan af breytingunni væri ekki fullljós þar sem reynslutímabilið væri ekki yfirstaðið. Þá sagði þingmaðurinn að huga hefði mátt betur að svæðaskiptingu í strandveiðikerfinu.

Ólína sagði að hafnir iðni nú af lífi. „Ég kem frá bæjarfélagi þar sem dauði hefur verið í höfnum." Það hafi breyst og fjölmargir eygi nú von í fyrsta sinn í langan tíma.

„Það er alveg augljóst mál að þetta hefur ekki leitt til neinnar nýliðunar," sagði Einar K. Guðfinsson, þingmaður Sjálfstæðisflokksins og fyrrverandi sjávarútvegsráðherra, og gerði jafnframt athugasemd við svæðaskiptingu í kerfinu sem hann sagði að hefði mistekist.