Byggingarkostnaður nálgast markaðsverð íbúða

Verulega hefur dregið saman með byggingarkostnaði fjölbýlis og markaðsverði undanfarið, en þar virðist þó enn vera talsvert meiri munur á en raunin var fyrir fimm árum síðan.

Greining Glitnis fjallar um málið í Morgunkorni sínu. Þar segir að líklegt sé að þetta bil minnki enn frekar eftir því sem fasteignaverð lækkar og kostnaður eykst, uns jafnvægi næst þegar búið er að ráðstafa því mikla framboði sem nú er á íbúðarhúsnæði.

Í nýrri mælingu á vísitölu byggingarkostnaðar fyrir febrúar sem Hagstofan birti í morgun kemur fram að vísitalan sem gildir í febrúar, en er reiknuð miðað við miðjan janúar, hefur hækkað um 28,6% frá sama tíma í fyrra.

Er hækkunin fyrst og fremst vegna mikillar hækkunar efnisliða, en þeir hækkuðu um tæplega 50% á tímabilinu á meðan vinnuliðir vísitölunnar hækkuðu um tæp 8% á sama tíma.