Karabatic segist fara frá Kiel 2012

Óvissan í kringum Frakkann Nikola Karabatic hjá Kiel virðist engan enda ætla að taka. Nýjasta nýtt er að stórskyttan segist ekki ætla að framlengja samning sinn við Kiel sem rennur út árið 2012.

Haft var eftir Karabatic í L´Équipe að hann myndi ekki vera áfram hjá Kiel en hann segir nú á heimasíðu sinni að blaðið hafi rangt eftir sér. Hann hafi sagt að ekki komi til greina að framlengja samninginn sem hann reyndar skrifaði undir fyrir ekki svo löngu síðan.

Karabatic segist hafa tilboð frá Barcelona, Ciudad Real og Montpellier. Hann segist vera spenntur fyrir því að fara heim til Frakklands en ekkert er ákveðið með framtíðina.

Karabatic segist enn fremur trúa á sakleysi síns gamla þjálfara, Noka Serdarusic, sem er undir smásjá þessa dagana eftir ásakanir um að hafa mútað dómurum.

Lengi vel var talið að Karabatic færi til Rhein-Neckar Löwen með Serdarusic en ekkert verður af því þar sem Löwen er hætt við að ráða þjálfarann.