Sakfelldur fyrir slysaskot í veiðifélagann

Maður var á miðvikudag dæmdur í fjögurra mánaða skilorðsbundið fangelsi fyrir að hafa af gáleysi valdið því að skot hljóp úr byssu og í framhandlegg veiðifélaga hans. Þá var Benelli haglabyssa í eigu mannsins gerð upptæk. Héraðsdómur Norðurlands eystra kvað upp dóminn.

Málsatvik voru þau að maðurinn hafði lagt haglabyssuna frá sér hlaðna í farangursgeymslu bifreiðar, þar sem ýmislegt annað dót lá, eftir andaveiðar með félaga sínum. Þvínæst kastaði hann poka með gerviöndum inn í farangursgyemsluna með þeim afleiðingum að skot hljóp úr byssunni, í gegnum hurðarfals og í veiðifélagann sem stóð fyrir utan að ganga frá.

Hlaut veiðifélaginn gapandi sár á framhandlegg og þurfti að gangast undir aðgerð þar sem fjarlægð voru högl og járnstykki.

Ákærði taldi sig hafa haft öryggið á byssunni og sagði skotið hafa hlaupið af á óútskýrðan hátt. Hann fór fram á sýknu í málinu, og mótmælti einnig upptökukröfu byssunnar þar eð af honum stafi ekki hætta og vopnið sé verðmætt.

Við ákvörðun refsingarinnar var horft til þess að ákærði hafði engan sakaferil, hann hafi reynt að bæta veiðifélaganum líkamstjónið eftir bestu getu og hann hafi verið samvinnufús við rannsókn málsins.

Auk þess kvað maðurinn málið hafa fengið mikið á sig og honum hafi ekki orðið svefnsamt fyrst eftir slysið. Þá sagðist hann nær alveg hafa lagt meðferð skotvopna á hilluna að sinni, en áður verið mikill skotvopnamaður.