Aðstoðarmaðurinn vissi um það sem ráðherra neitar

Það er athyglisvert að Jón Þór Sturluson aðstoðarmaður Björgvins G. Sigurðssonar viðskiparáðherra virðist hafa verið betur upplýstur en ráðherrann um tilboð Breta um að koma Icesave í breska lögsögu.

Sem kunnugt er af fréttum hefur Björgvin neitað því að hafa vitað af tilboði breska fjármálaeftirlitsins (FSA) um að koma Icesave í breska lögsögu. Þetta kom fram í svari hans við fyrirspurn frá Siv Friðleifsdóttur þingmanni Framsóknarflokksins á alþingi.

Jón Þór Sturluson var meðal gesta í þætti Björns Inga Hrafnssonar, Markaðinum, þann 18. október s.l. þar sem Halldór J. Kristjánsson fyrrum bankastjóri Landsbankans ræddi m.a. um þetta mál.

Aðspurður sagði Jón Þór þá að miklar viðræður hefðu verið í gangi um málið milli FSA, íslenska fjármálaeftirlitsins og Landsbankans mánuðina á undan íslenska bankahruninu. Allir hefðu gert sér grein fyrir að æskilegast væri að koma Icesave í breska lögsögu.

Jón Þór sagði að það hefði verið inni í myndinni af hálfu FSA að Icesave fengi „hraðmeðferð" inn í breska lögsögu eins og hann orðaði það. Og það hefði verið leitt að slíkt skyldi ekki takast.

Spurningin sem vaknar er hvort aðstoðarmaðurinn hefði ekki greint ráðherra sínum frá öllu þessu ferli?