Nauðgun kærð í Eyjum

Grunur leikur á að rúmlega tvítugri stúlku hafi verið nauðgað á þjóðhátíð í Vestmannaeyjum í nótt. Stúlkan leitaði á lögreglustöðina í Vestmannaeyjum undir morgun og kærði atvikið. Hún gat gefið greinagóða lýsingu á manninum en hann er þó ekki fundinn. Stúlkan var flutt á neyðarmóttöku fyrir kynferðisbrot á sjúkrahúsinu í Vestmannaeyjum þar sem hún er nú. Lögreglan vinnur að rannsókn málsins.

Þá var kalrmaður fluttur á sjúkrahús með kinnbeinsbrot og nefbrot eftir að sparkað var í andlitið á honum. Árásarmannsins er leitað. Þá gistu tveir fangageymslur, þar af einn vegna gruns um fíkniefnamisferli.

Alls hafa komið upp níu fíkniefnamál hjá lögreglunni í Vestmannaeyjum frá því síðdegis í gær, einkum vegna amfetamíns og kókaíns. Í flestum tilfellum var um að ræða neysluskammta, en einn hafði undir höndum tíu skammta og gistir hann fangageymslur.

Mikil ölvun var í Vestmannaeyjum í nótt en gestir hegðuðu sér að sögn lögreglu almennt nokkuð vel. Veðurblíðan lék við þjóðhátíðargesti sem eru orðnir fleiri en sjö þúsund.