Icesave-samningur meitlaður í stein

Fjármálaráðherra vill ekki ræða fyrirvara við Icesave heldur segir hann Alþingi einungis vera að búa til umgjörð um ríkisábyrgð vegna reikninganna. Hann segir fátt um gildi slíkrar umgjarðar. Bretar telja að ríkisstjórn Íslands hafi skuldbundið sig til að tryggja stuðning Alþingis við samningana.

Fjárlaganefnd Alþingis reynir að útbúa fyrirvara við frumvarp um ríkisábyrgð vegna Icesave reikninganna og þverpólitíska sátt um málið.

Einnig eru hátt settir stjórnmálamenn að vinna á bak við tjöldin, að því sem kallað er „harðir" fyrirvarar. Heimildarmenn fréttastofu hafa sagt að náist samkomulag um slíka fyrirvara, þá þýði það að semja verði upp á nýtt, við Hollendinga og Breta. Bretar virðast telja að samningum sé lokið og nú standi upp á ríkisstjórnina að keyra málið í gegn.

Talsmaður breska fjármálaráðuneytisins segir í bréfi til fréttastofu að ríkisstjórn Bretlands telji að ríkisstjórn Íslands hafi skuldbundið sig til að tryggja stuðning Alþingis við þann samning sem gerður var fimmta júní síðast liðinn, milli Íslands og Bretlands.

Steingrímur J. Sigfússon, fjármálaráðherra, virðist enda ekki gera ráð fyrir því að fyrirvarar verði gerðir við samþykkt ríkisábyrgðar, heldur eingöngu að unnin verði tiltekin umgjörð um hana. Fjárlaganefnd vinni nú að henni og hann treysti henni til að ná farsælli niðurstöðu.

En hvaða gildi hefur sú niðurstaða?

Steingrímur segir hana hafa það gildi sem hún hefur. Hann bendir jafnframt á öryggisákvæði í samningnum sem í umgjörð Alþingis megi reyna að tengja við.