Ótti meðal Íslendinga á Mallorca í lágmarki

Sprengingin sem varð á strandbar á Mallorca í dag er stutt frá dvalarstað nokkurra Íslendinga, þó nógu langt frá til að hætta stafi ekki af sprengingunni. Að sögn fararstjóra Heimsferða á Mallorca eru íslenskir ferðamenn frekar rólegir yfir atburðum undanfarinna vikna en þetta er önnur sprengjan sem springur á Mallorca á stuttum tíma.

„Þetta er stutt frá okkur, en samt nógu langt frá til þess að við finnum ekki fyrir þessu," segir María Perello, fararstjóri Heimsferða á Mallorca. María var stödd í siglingu þegar fréttastofa náði tali af henni og hafði ekki einu sinni heyrt af sprengingunni.

Sprengjan sprakk á klósetti strandbarsins La Rigoletta. Í lok síðasta mánaðar sprakk bílsprengja á svipuðum slóðum með þeim afleiðingum að tveir létu lífið.

María segist þó ekki merkja mikinn ótta meðal Íslendinga sem eru Mallorca. „Það hefur enginn haft orð á því við mig. Enda reynir fólk að einbeita sér að öðru," segir María. „Kannski er fólk líka pínulítið dofið yfir þessum atburðum. Það er kannski einhverja örfáa daga þar sem fólk hefur tilfinningu sem kalla má hræðslu. Síðan gengur lífið sinn vanagang. Þó auðvitað hafi svona hræðilegir atburðir einhver áhrif."

Utanríkisráðuneytið hefur sett sig í samband við sendiráðið í Frakklandi en ræðismaður á Mallorca fellur undir það. Ráðuneytið fylgist með gangi málsins og er í viðbragðsstöðu að grípa inn í ef með þarf.