Lemgo komst ekki í Meistaradeildina

Lemgo mistókst að tryggja sér þátttökurétt í Meistaradeild Evrópu í handbolta í sérstökum aukariðli sem nú fer fram á Spáni en Björgvin Páll Gústavsson og félagar í Kadetten Schaffhausen frá Sviss eru í góðum málum.

Lemgo tapaði í gær fyrir Celje Lasko, 28-27, og hafði þar áður tapað fyrir Schaffhausen þar sem Björgvin Gústavsson átti stórleik og varði 22 skot.

Vignir Svavarsson skoraði eitt mark fyrir Lemgo í gær en Logi Geirsson gat ekki spilað með liðinu vegna meiðsla.

Schaffhausen gerði í gær jafntefli við heimamenn í Ademar Leon og eru nú bæði lið með þrjú stig í efsta sæti riðilsins. Schaffhausen hefur þó skorað fleiri mörk og er því í efsta sæti riðilsins.

Aðeins liðið sem sigrar í riðlinum kemst inn í Meistaradeildina. Í dag mætast Schaffhausen og Celje Lasko annars vegar og Lemgo og Ademar LEon hins vegar.