Borgarahreyfingin: Formaðurinn telur flokkinn áhrifalausan í Icesave

Herbert Sveinbjörnsson, formaður Borgarahreyfingarinnar, telur þingflokk Borgarahreyfingarinnar ekki hafa nein áhrif á Icesave málið.

„Þetta er sorgleg staða sem komin er upp. Mér prívat og persónulega finnst of miklu fórnað fyrir þetta Icesave mál sem ég tel að þinghópur borgarahreyfingarinnar hafi engin áhrif á þegar upp er staðið," segir Herbert í samtali við fréttastofu RÚV.

Hann ræddi þar klofninginn sem kominn er upp innan þingflokks Borgarahreyfingarinnar. Herbert segir sáttanefnd skipaða sex einstaklingum hafa verið skipaða á félagafundi í gær til að setjast niður með þinghópnum og hjálpa þeim að sættast og finna lausn sinna deilumála.