Rússneskir Birnir létu sjá sig í síðustu viku

Tvær rússneskar TU-95 sprengjuflugvélar, eða svonefndir Birnir, flugu um íslenska loftrýmiseftirlitssvæðið í síðustu viku, aðeins sólarhirng áður en bandaríski flugherinn hóf loftrýmisgæslu hér. Ferðum þessara véla fer aftur fjölgandi á norðurslóðum.

Þetta gerðist á miðvikudaginn var, og komu þær inn á svæðið norðaustur af landinu. Síðan flugu þær í suður, á milli Íslands og Færeyja og komu næst landinu í 50 sjómílna fjarlægð.Loks héldu þær á brott suðaustur af landinu. Þar með hafa tólf Birnir komið upp að íslandsströndum það sem af er árinu, ávalt tvær og tvær vélar í senn.

Að vanda gerðu vélarnar ekki vart við sig, en í samræmi við verklagsreglur var Flugstoðum og Flugmálastjórn gert viðvart til að tryggja öryggi borgaralegs flulgs, eða venjulegs áætlunarflugs. Svona vélar geta borið kjarnorkuvopn, en staðfestar upplýsingar liggja ekki fyrir um búnað þeirra á ferðum sem þessum, að sögn Varnarmálaskrifstofunnar.