Stefna á Íslandsmet í hópsundi í sjó

ÍTR Siglunes stefnir að því að slá Íslandsmet í hópsjósundi í dag í samstarfi við apótekið Lyfju. Til stendur að halda hópskemmtisund frá Nauthólsvík og yfir til Kópavogs, og fyrir þá allra hörðustu til baka aftur.

Sundið hefst klukkan 18 og er sundleiðin um fimmhundruð metrar, en kílómeter báðar leiðir.

Samkvæmt tilkynningu verður fyllsta öryggis gætt þar sem þrír bátar frá Siglunesi munu fylgja sundmönnunum eftir. Fyrir sundið verða afhentar sundhettur frá Lyfju og allir fá viðurkenningarskjal sundinu til staðfestingar.

Ef þátttaka verður góð er möguleiki á að Íslandsmetið í hópsundi í sjó falli á eftir.

Hægt er að skrá sig í sundið í móttöku Ylstrandar Nauthólsvíkur.