Togarinn Sólbakur færður til hafnar

Varðskip færði togarann Sólbak EA til hafnar á Akureyri á sjötta tímanum í morgun, eftir að skipstjórinn var staðinn að meintum ólöglegum veiðum noðrvestur af landinu í gær. Eftir því sem Fréttastofan kemst næst snýst málið um möskvastærð í trollinu og útbúnað á smáfiskaskilju, sem á að hleypa smáfiski lifandi út úr trollinu.

Skýrslur verða teknar af yfirmönnum togarans og veiðarfærin rannsökuð nánar.

Þá var lítill handfærabátur staðinn að meintum ólöglegum veiðum í lokuðu hólfi á Breiðafirði í gær. Honum var vísað til Ólafsvíkur, þar sem mál bátsverja verður tekið fyrir.Brot á fiskveiðilöggjöfinni eru orðin afar fátíð, hvað þá að tvö slík mál komi upp sama daginn.