Vill sjá glæsisundlaug við Lækjargötu

„Er þörf á fleiri minjagripabúðum eða kaffihúsum eins og líklegast koma þarna í staðinn? Við erum gjörn á að missa tækifærin til að gera skemmtilega hluti frá okkur," segir sjónvarpsmaðurinn Egill Helgason í samtali við fréttastofu.

Hann stingur upp á því á heimasíðu sinni í dag að reist verði glæsileg sundlaug á reitnum á horni Lækjargötu og Austurstrætis, sem staðið hefur auður síðan húsaþyrping þar brann á þarsíðasta ári.

„Við göngum svo oft þarna fram hjá fjölskyldan og þetta kom upp í einhverju spjalli okkar á milli. Við höldum að þetta gæti verið flott," segir Egill, sem vill reisa þarna fallega hannaða laug sem nýtir jarðhita til hins ítrasta; sumsé engan poll.

„Mér finnst þetta alls ekki galið," segir Egill, sem telur aðspurður raunhæfan möguleika á að hægt sé að framkvæma hugmyndina.

Hann segist þó ekki ætla að einbeita sér frekar að því að vinna hugmyndinni fylgis, heldur hafi hann einfaldlega kastað henni fram á heimasíðu sinni.

Egill segir þó kíminn ekki loku fyrir það skotið að hann gerist sundlaugarvörður laugarinnar í ellinni yrði hún að veruleika, enda sé hann mikill miðbæjarmaður.

Færslu Egils má lesa hér.