Yfir 100 greinst með svínaflensu

Yfir hundrað hafa nú greinst með svínaflensuna hér á landi. Sóttvarnarlæknir segir ástandið erfitt og að mikið álag sé á heilbrigðisþjónustunni.

Langflestir þeirra sem smitast eru í aldurshópnum 15-19 ára. Haraldur Briem sóttvarnarlæknir segir það mögulega skýrast af því að hópurinn er mest á hreyfingu og á mannamótum. Hann segir þó alls óvíst hvort þessi faraldur verði skæðari en venjuleg flensa.

Í síðustu viku lést lítil stúlka úr heilahimnubólgu í Bretlandi eftir hafa verið ranglega greind með svínaflensu. Haraldur segir að fylgjast þurfi vel með einkennum því sjúkdómar eins og heilahimnubólga, lungnabólga og blóðsýkingar geti haft svipuð einkenni og inflúensan.