Mútumál skekur þýskan handbolta

Þýskir fjölmiðlar greindu frá því í morgun að rannsaka ætti hvort að Kiel hafi mútað dómurum úrslitaleiks Meistaradeildar Evrópu gegn Flensburg árið 2007.

Það var Flensburger Tageblatt sem greindi frá þessu í dag. Það er þó enn lítið um áþreifanlegar upplýsingar eða sönnunargögn en forráðamenn þýska handknattleikssambandsins munu funda um málið nú í kvöld.

Fyrri leik liðanna í úrslitarimmunni lauk með jafntefli, 28-28. Kiel vann svo síðari leikinn, 29-27, og mun hafa mútað pólskum dómurum þess leiks.

Uwe Schwenker, framkvæmdarstjóri Kiel, vildi ekkert láta hafa eftir sér um málið en hristi hausinn þegar hann var spurður um það af þýskum fjölmiðlamönnum.

Lars Christiansen, leikmaður Flensburg, á erfitt með að trúa þessu. „Vissulega vorum við svekktir eftir leik og okkur fannst þetta ekki sanngjarnt. En ég get ekki ímyndað mér að þessi háttur hafi verið hafður á."

Noka Serdarusic var á sínum tíma þjálfari Kiel en hann hætti þar nú í vor. Alfreð Gíslason tók við hans starfi.

Til stóð að Serdarusic myndi taka við þjálfun Rhein-Neckar Löwen í sumar en hann hætti við það af heilsufarsástæðum.