Velta á húsnæðismarkaði hefur minnkað um 65%

Mikið hefur dregið úr veltu á húsnæðismarkaði undanfarið eða um 65% í janúar m.v. sama mánuð í fyrra. Alls voru gerðir 117 kaupsamningar um íbúðahúsnæði á höfuðborgarsvæðinu í janúarmánuði.

Greining Glitnis fjallar um málið í morgunkorni sínu. Þar segir að umsvifin á íbúðamarkaði hefur samkvæmt þessum tölum dregist saman um 65% á milli ára en í janúar fyrir ári síðan voru gerðir 324 kaupsamningar um íbúðarhúsnæði á höfuðborgarsvæðinu.

28 kaupsamningar voru gerðir á hverri viku að meðaltali í janúar og var veltan að meðaltali 837 milljónir kr. hverja viku mánaðarins.

Þetta er mikill viðsnúningur frá fyrri tíð en til samanburðar þá voru gerðir allt að 300 samningar um íbúðarhúsnæði á viku hverri haustið 2004 og sumarið 2007 þegar umsvifin á íbúðarmarkaði voru sem mest.

Þá var veltan á íbúðarmarkaði í kringum 6 milljarðar kr. á viku sumarið 2007 þegar mest lét.