Sex nýir starfsmenn Saga Capital

Sex nýir starfsmenn hafa tekið til starfa hjá Saga Capital.

Í tilkynningu um málið segir að þetta eru eftirfarandi einstaklingar:

Borghildur Sif Marinósdóttir hefur verið ráðin til starfa sem sérfræðingur á Uppgjörssviði Saga Capital Fjárfestingarbanka. Borghildur er með B.Sc. gráðu í viðskiptafræði frá Háskólanum í Reykjavík og starfaði áður sem sérfræðingur hjá Glitni og hjá Landsbanka Íslands.

Guðrún Högnadóttir hefur tekið til starfa sem sérfræðingur á Uppgjörssviði. Guðrún er með B.Sc. gráðu í viðskiptafræði frá Háskólanum í Reykjavík og stundar nám til prófs í verðbréfaviðskiptum. Hún starfaði áður hjá Landsbanka Íslands og Skattstofu Vesturlandsumdæmis.

Írena Elínbjört Sædísardóttir er nýr starfsmaður á Fjármálasviði Saga Capital. Írena er með B.Sc. gráðu í viðskiptafræði frá Háskólanum í Reykjavík. Hún starfaði áður m.a. hjá Norvík hf. sem á meðal annars BYKO, ELKO, Nóatún og Krónuna.

Katrín Ýr Pétursdóttir er nýráðin framkvæmdastjóri Uppgjörssviðs Saga Capital. Hún stundar nám í rekstrar- og viðskiptafræði við Háskóla Íslands og starfaði áður sem deildarstjóri bakvinnslu og erlendra viðskiptatengsla hjá Arion verðbréfavörslu, hjá Kaupþingi sem deildarstjóri bakvinnslu og við þróun kerfismála og í erlendum viðskiptum hjá Seðlabanka Íslands.

Óli Þór Jónsson er nýr starfsmaður á sviði eigin viðskipta hjá Saga Capital. Óli Þór er verkfræðingur frá Aalborg Universitet í Danmörku og með B.Sc. í véla- og iðnaðarverkfræði frá Háskóla Íslands. Hann stundar nám til prófs í verðbréfaviðskiptum. Óli starfaði áður sem sérfræðingur á Verðbréfasviði hjá Landsbanka Íslands og sem verkfræðingur hjá Verkfræðistofu Sigurðar Thoroddsen.

Róbert Styrmir Helgason hefur tekið til starfa sem sérfræðingur á Uppgjörssviði. Róbert er með B.S. í viðskiptafræði frá Viðskiptaháskólanum á Bifröst og er að ljúka mastersnámi í E.U. Business and Law við Viðskiptaháskólann í Árósum. Róbert vann áður í bakvinnslu hjá Glitni.