Aðalfundur Nýherja féll frá 20% arðgreiðslu fyrir síðasta ár

Fyrir aðalfund Nýherja s.l. föstudag lá tillaga um 20% arðgreiðslu. Í máli stjórnarformanns kom fram að í viðræðum við lánardrottna félagsins hafi komið fram tilmæli um að ekki yrði greiddur út arður í ljósi þeirra alvarlegu aðstæðna sem nú ríkja.

Stjórnarformaður lagði því af þessu tilefni fram breytingartillögu um að greiða ekki út arð fyrir árið 2008. Breytingartillaga stjórnarformanns var samþykkt samhljóða.

Í tilkynningu um samþykktir fundarins kemur fram að samþykkt var tillaga um stjórnarlaun fyrir starfsárið 2008. Stjórnarformaður fær kr. 2.550.000, stjórnarmenn kr. 850.000 og varamaður kr. 63.000 fyrir hvern fund.

Eftirtaldir skipa stjórn fyrir næsta starfsár: Benedikt Jóhannesson, Árni Vilhjálmsson og Guðmundur Jóh. Jónsson. Samþykkt var að varamaður verði Jafet S. Ólafsson.

Þá var samþykkt tillaga um heimild félagsins til kaupa á eigin hlutum skv. 55. grein hlutafélagalaga, þar sem stjórn er heimilt fyrir hönd félagsins að kaupa allt að 10% af nafnverði hlutafjár félagsins. Kaupgengi hluta má ekki vera meira en 20% hærra eða lægra en síðasta skráða gengi í Kauphöll Íslands. Gildistími heimildarinnar er allt að átján mánuðir.