Vilja dreifa umferð um Esjuna

Unnið hefur verið að því í að búa til nýja göngustíga um hlíðar Esjunnar í sumar til að dreifa umferð um fjallið en ágangur þar hefur verið óvenju mikill. Að sögn Bergþóru Einarsdóttur, flokksstjóra hjá Skógræktarfélagi Reykjavíkur, sem hefur umsjón með Esjuhlíðum, hefur verið stöðugt streymi upp að Þverfellshorni, sem er vinsælasta gönguleiðin.

„Ætlunin er að búa til þéttara gangstígakerfi svo umferðin dreifist og það verði til fjölbreyttari gönguleiðir, bæði um hlíðarnar og yfir í Kollafjarðarflóa. Þá verður ekki bara farin leiðin upp og niður,“ segir Bergþóra.

Bergþóra segir fjöldann allan af göngustígum vera um Esjuna. Þeir séu merktir inn á deiliskipulag og í ferðahandbókum. Samkvæmt upplýsingaskilti við rætur fjallsins er hins vegar bara ein leið merkt, sú sem liggur upp að Þverfellshorni.

„Það er mikil þörf á að setja upp fleiri upplýsingaskilti til að dreifa umferðinni en það eru einkaaðilar sem fjármagna það og við erum að vinna í því að fá einhvern til að styrkja það. Það er líka mikið um fornminjar á svæðinu og það er mikilvægt að merkja þær til að fræða almenning,“ segir Bergþóra.