Bróðurpartur geislafræðinga hjá Krabbameinsfélaginu missir störf

Sex geislafræðingar hjá Krabbameinsfélagi Íslands sem starfa við brjóstamyndatökur munu missa vinnuna í byrjun næsta mánaðar ef fer sem horfir. Geislafræðingum var öllum sagt upp, níu að tölu, frá 1 júní síðastliðnum og ástæðan sögð vera sparnaður og endurskipulagning. Um mánaðarmótin júní - júlí var síðan gert munnlegt samkomulag um endurráðningu flestra og að svo búnu fóru þeir í sumarleyfi.

Samkvæmt upplýsingum Vísis, frá geislafræðingum sem vildu ekki láta nafns síns getið, fengu geislafræðingar svo tilkynningu um það eftir að þeir fóru í sumarfrí að búið væri að semja við Læknisfræðilega myndgreiningu, sem er einkarekin stöð í Domus Medica, um að taka að sér rekstur á störfum geislafræðinga og röntgenlækna við Leitarstöð Krabbameinsfélagsins.

Á fundi geislafræðinga í fyrradag með stjórnendum Krabbameinsfélags Íslands og Læknisfræðilegrar myndgreiningar kom fram að aðeins á að ráða 3 af geislafræðingum Krabbameinsfélags Íslands og sex munu þar af leiðandi missa vinnuna. Þá munu 3 geislafræðingar sem nú þegar í vinnu hjá Læknisfræðilegri myndgreiningu starfa við brjóstamyndatökur.