Hlegið ef Íslendingar hótuðu að ganga úr NATO

Samningsstaða Íslendinga í þorskastríðunum var yfirleitt betri en nú um stundir, segir Guðni Th. Jóhannesson sagnfræðingur í grein um Icesave sem birtist í Fréttablaðinu í dag.

„Í þorskastríðunum gátu íslenskir valdhafar barið í borðið og haft í hótunum. Alþjóðalög voru að þróast þeim í hag og alþjóðasamfélagið hafði yfirleitt samúð með „litla Íslandi". Svo skipti hernaðarmikilvægi landsins jafnvel sköpum en ætli það yrði ekki bara hlegið núna ef íslenskir ráðamenn berðu í borð og hótuðu að segja upp varnarsamningnum við Bandaríkin eða ganga úr NATO? " spyr Guðni í greininni.

Í greininni rekur Guðni samskipti Íslendinga við Breta í svokölluðum þorskastríðum. Hann segir þau reyndar alls ekki hafa verið stríð í hefðbundnum skilningi. Styrjaldir séu gjarnan skilgreindar sem átök þar sem minnst nokkur hundruð eða þúsund manns láti lífið og öflugum skotvopnum sé beitt.