Gunnar stýrir nefnd um tekjustofna sveitarfélaga

Gunnar Svavarsson, fyrrum þingmaður Samfylkingarinnar, er formaður nefndar sem ætlað er að vinna tillögur um að styrkja tekjustofna sveitarfélaga. Nefndin kom saman í fyrsta sinn í gær.

Gunnar var formaður fjárlaganefndar Alþingis 2007 til 2009. Hann sóttist ekki eftir endurkjöri í kosningunum í apríl. Gunnar hefur átt sæti í bæjarstjórn Hafnarfjarðar frá 2002.

Kristján Möller, samgönguráðherra, skipaði nefndina fyrr í sumar í samræmi við samstarfsyfirlýsingu ríkisstjórnarinnar en þar er kveðið á að vinna skuli tillögur um að breikka og styrkja tekjustofna sveitarfélaga.

Auk þess að leggja fram tillögur um tekjustofna er nefndinni ætlað að undirbúa nauðsynlegar breytingar á lögum í tengslum við breytta verkaskiptingu ríkis og sveitarfélaga sem koma á til framkvæmda árið 2011, að fram kemur á vef samgönguráðuneytisins.

Þar segir að á fyrsta fundi nefndarinnar hafi nefndarmenn rætt um tilhögun verkefnisins og fyrirkomulag vinnunnar.