Ríkisstjórn Geirs hafnaði milljarða láni frá Rússum

Ríkisstjórn Geirs H. Haarde, fyrrverandi forsætisráðherra, falaðist bæði eftir og hafnaði síðan milljarða láni frá Rússum vegna kreppunnar. Þetta segir sendiherra Rússa á Íslandi.

Í viðtali við vefsíðuna Netvarpið.is segir Victor I. Tatarintsev, sendiherra Rússlands á Íslandi, að Rússland hafi verið fyrsta landið, sem í upphafi október í fyrra hafi boðið aðstoð til handa Íslandi í efnahagshruninu eftir að þáverandi stjórnvöld á Íslandi hafi óskað eftir aðstoð. Um hafi verið að ræða lán upp á fjóra milljarða evra.

„Fyrrum ríkisstjórn ykkar vildi ekki lánið og í staðinn fóru þið til Alþjóðagjaldeyrissjóðsins," segir Tatarintsev.

Sendiherrann telur að ef íslenska ríkisstjórnin hefði samþykkt að taka lánið sem hún hafi í upphafi óskað eftir væri staðan á Íslandi allt önnur í dag að hans mati. Kreppan væri ekki eins mikil.

Í viðtalinu við Netvarpið segir Tatarintsev að Bandaríkin, Norðurlöndin og önnur ríki sem talist hafi til vina Íslands hafi snúið baki við Íslendingum. Það hafi Rússar ekki gert og þeir boðið aðstoð sína.

Seðlabankinn sendi tilkynningu frá sér þann 7. október í fyrra um lán frá Rússum til Íslendinga. Það var dregið til baka samdægurs og sagt að viðræður myndu hefjast sem munu hafa staðið með hléum síðan þá.

Í fréttum í rússneskum miðlum í júní var haft eftir staðgengli fjármálaráðherra Rússlands að ekki væri víst að íslenska ríkið myndi þiggja lán af Rússum fyrr en á næsta ári ef samningar um lánskjör nást. Verið sé að ræða um minna lán en rætt var í október, eða um 500 milljónir dala lán.