Hollendingurinn leigði skútuna á hálfa milljón

Dópsmyglararnir sem teknir voru nú um helgina staðgreiddu hálfa milljón króna fyrir tveggja vikna leigu á skútunni Sirtaki sem notuð var við smyglið. Þrír þeirra eru þessa stundina í Héraðsdómi Austurlands á Egilsstöðum þar sem þeir bíða þess að verða úrskurðaðir í gæsluvarðhald.

Varðskipið Týr kom með smyglskútuna Sertaki á Eskifjörð um klukkan átta í morgun. Um borð í Týr voru þeir Rúnar Þór Róbertsson og Árni Hrafn Ásbjörnsson sem grunaðir eru um að hafa staðið að smyglinu. Um borð í Sirtaki var Hollendingur sem fenginn var til að sigla skútunni til Íslands en um borð voru meira 100 kíló af fíkniefnum sem reynt var að smygla til landsins.

Hollendingurinn tók skútuna á leigu þann 11. apríl síðastliðinn. Þá gaf hann þær upplýsingar að hann ætlaði að sigla skútunni um Ermarsundið í nokkra daga. Hann staðgreiddi 3000 evrur eða um 500 þúsund íslenskar krónur fyrir tveggja vikna leigu á Sirtaki. Greiðslan var millifærð úr hollenskum banka.

Samkvæmt þessu tók það smyglarana eina viku að sigla frá Belgíu og að Papey. Morgunblaðið greinir frá því í dag að skipverjar á íslensku fiskiskipi hafi komið auga á Sertaki snemma á laugardag og látið lögreglu vita og þannig hafi hún komist á sporið um smyglið.

Sirtaki kom til hafnar á Eskifirði nú í morgun. Íslendingarnir tveir bíða ásamt Hollendingnum eftir því að verða leiddir fyrir dómara þar sem þeir verða úrskurðaðir í gæsluvarðhald. Lögreglan hefur tekið flugvél á leigu til að fljúga svo með þremenninga beint á Selfoss þaðan sem þeim verður ekið á Litla-Hraun. Þar eru fyrir þremenningarnir sem tóku við efnunum við Papey og voru svo handteknir í landi seinna um laugadagskvöldið. Þeir voru allir úrskurðaðir á sunnudaginn í gæsluvarðhald til 11. maí.