Vignir markahæstur í sigri Lemgo

Vignir Svavarsson skoraði sex mörk og var markahæstur leikmanna Lemgo sem vann sigur á Grosswallstadt, 25-20, í þýsku úrvalsdeildinni í handbolta í gærkvöldi.

Logi Geirsson á við meiðsli að stríða og gat ekki spilað með Lemgo. Sverre Andreas Jakobsson lék með Grosswallstadt en komst ekki á blað.

Þá vann Wetzlar sigur á Füchse Berlín á heimavelli, 27-26. Rúnar Kárason skoraði eitt mark fyrir Füchse Berlín en Dagur Sigurðsson er þjálfari liðsins.

Hamburg tapaði óvænt sínum fyrsta leik á tímabilinu er liðið mætti Göppingen á útivelli. Lars Kaufmann fór á kostum og skoraði ellefu mörk fyrir Göppingen sem vann nauman sigur, 36-35.

Kiel er á toppi deildarinnar með sautján stig en Hamburg og Göppingen í 2.-3. sæti með fjórtán stig. Hamburg á þó leik til góða.

Lemgo er í fjórða sæti með þrettán stig og Rhein-Neckar Löwen í því fimmta með tólf.