Elín sækir ekki um sem bankastjóri í Nýja Landsbankanum

Elín Sigfúsdóttir, núverandi bankastjóri Nýja Landsbankans, ætlar ekki að sækja um stöðuna sem bankaráð bankans ákvað í dag að auglýsa lausa til umsóknar. Auglýsingin mun birtast á næstu dögum en Elín mun gegna stöðunni þar til nýr bankastjóri hefur verið ráðinn. Nánar verður fjallað um málið í kvöldfréttum Stöðvar 2.

Í ljósi tilkynningar bankaráðs um að auglýsa stöðu bankastjóra vill Elín taka eftirfarandi fram:

,,Ég var beðin um að stýra bankanum í gegnum þær breytingar sem upp komu í kjölfar þess ástands sem skapaðist á fjármálamarkaði í byrjun október. Ég hef frá upphafi gert mér grein fyrir því að starfið var tímabundið og mun ekki sækja um það þegar það verður auglýst. Að ósk bankaráðs mun ég sinna starfi mínu áfram þar til nýr bankastjóri hefur verið ráðinn.

Ég vil ég þakka bankaráðinu, starfsfólki Landsbankans og þeim fjölda viðskiptavina sem ég hef átt samskipti við í gegnum árin, kærlega fyrir samstarfið og óska samstarfsfólki mínu og bankanum farsældar í framtíðinni.

Elín Sigfúsdóttir

bankastjóri."