Zhang Keyuan fer frá Íslandi til Möltu

Zhang Keyuan, sem hefur verið sendiherra Kína á Íslandi síðan í ágúst í fyrra, verður nýr sendiherra Kínverja á Möltu. Frá þessu er greint á vefsíðu maltneska blaðsins The Malta Independent í morgun.

Keyuan komst í fréttirnar í júní síðasliðnum vegna heimsóknar tíbetska trúarleiðtogans Dalai Lama til Íslands. Eftir fundi Dalai Lama með íslenskum ráðherrum meðan á heimsókninni stóð var fullyrt í íslenskum fjölmiðlum að sendiherra Kínverja yrði kallaður heim frá Íslandi. Þeim fréttum var vísað á bug. Hvort flutningur sendiherrans tengist heimsókn trúarleiðtogans frá Tíbet er óvíst en Möltu er vart hægt að líkja við Síberíu þangað sem Sovéskir leiðtogar voru sagðir senda fulltrúa sem brugðust þeim.