Brotist inn í verslun Grétars líkmanns

Brotist var inn í verslunina 1body í fyrrinótt en verslunin er í eigu Grétars Sigurðarsonar, fyrrum lífvarðar Tiger Woods og sakbornings í líkfundarmálinu svokallaða. Hann segir kreppuna slæma ef menn haldi að þeir geti rænt hann og komist upp með það. Hann telur menn með þekkingu á fæðubótarefnum standa að baki þjófnaðnum.

Grétar opnaði verslun sína í október. Verslunin er staðsett í Skipholti 15 og þar hefur Grétar til sölu ýmiskonar fæðubótarefni og fylgihluti lyftinga. Í fyrrinótt brutust óprúttnir aðilar inn í verslunina með því að spenna upp glugga fyrir ofan aðalinngang hennar. „Þetta er beint á móti traffík og íbúðarhúsum," segir Grétar. Hann segir ekki mikla peninga hafa verið tekna, einungis skiptimynt. Meiri verðmæti liggi hinsvegar í þeim vörum sem teknar voru.

„Þetta virðast nú vera einhverjir menn sem að þekkja til þessara vara. Þeir tóku nánast bara USSR vörur, ég er einn með þær á landinu. Þær virka hrikalega og eru þar af leiðandi dýrari. Þetta kýlir mann hrikalega áfram," segir Grétar en dýrari vörur voru teknar í mun meira mæli en þær ódýrari.

Glugginn sem farið var inn um er þó ekki stór, og því hæpið að vöðvabúnt hafi náð að troða sér þar inn. „Þeir hljóta að hafa verið með einhvern trítil með sér," segir hann og hlær. Honum finnst vöruval þjófana sérkennilegt þar sem hann hefur auglýst vörur sínar lítið og fáir þekki gæðin, einungis þeir sem þekkja til. „Þetta eru smekkmenn, það verður að gefa þeim það."

Grétar útilokar ekki að um eiturlyfjaneytendur sé að ræða sem hafi vitað um verðmæti efnanna og því ætlað að koma þeim í verð. „Það er einhver sem að veit eitthvað um vöruna á bakvið þetta, það er það sem pirrar mig." Hann segir tjónið vera í kringum milljón króna.

Grétar á sér skrautlega fortíð. Árið 2005 var hann dæmdur í tveggja og hálfs árs fangelsi fyrir aðild sína að líkfundarmálinu svokallaða. „Mér þykir kreppan orðin andskoti slæm ef að menn vaða inn til mín og halda að þeir geti komist upp með það. Það er kannski hrokafullt að segja það, en þannig er það bara," segir Grétar sem hefur litla trú á að lögregla muni upplýsa glæpinn. Þess í stað hefur hann snúið sér til félaga sinna sem þekkja til í undirheimunum. „Jú að sjálfsögðu. Það er stór hópur manna að vinna í því að finna út hver var að verki," segir Grétar.

Hann segir hlutina finnast mun frekar með aðstoð þeirra sem sambönd hafa við undirheima. „Maður er mikið, mikið fljótari að finna hlutina þannig. Þegar maður var í þessu rugli var maður oft beðinn um þetta. Það gekk oft upp á nokkrum klukkutímum. Ef hlutirnir skila sér í gegnum lögregluna er það í gegnum heppni. Lögreglan hefur hvorki mannskap né pening í að rannsaka svona mál," segir Grétar.

Hann þakkar fyrir að eiga vel tengda vini frá fyrra líferni. „Þeir eru ekki verri vinirnir þaðan get ég sagt þér," segir hann og hlær. Hann lætur engan bilbug á sér finna. „Ég lifi þetta af, ég hef nú séð það svartara. Þetta er leiðinlegt engu að síður. Ég var samt hrifinn af valinu hjá þeim," segir hann kátur þrátt fyrir skakkaföllin.