Segir skilanefndarmenn þurfa að fara varlega

Viðskiptaráðherra segir að skilanefndarmenn þurfi að fara varlega í að taka ákvarðanir sem koma þeim eða skyldum aðilum vel. Hann segir að skilanefndirnar hafi mikil áhrif og völd tímabundið en ekki alveg frítt spil.

Flestir skilanefndarmenn eru ýmist lögfræðingar eða löggiltir endurskoðendur og starfa sem verktakar. Tveir þeirra, Lárentsínus Kristjánsson, formaður skilanefndar Landsbankans og Steinar Þór Guðgeirsson, formaður skilanefndar Kaupþings, eru starfsmenn Lögfræðistofu Reykjavíkur og meðal eigenda hennar. Svipaða sögu er að segja af fleiri skilanefndarmönnum, sem margir hverjir eru starfsmenn endurskoðunarfyrirtækja eða lögfræðistofa sem selja út þjónustu þeirra. Einhverjir starfa þó sjálfstætt.

Skilanefndirnar ráða lögfræðistofur í ráðgjöf og annað í tengslum við ýmis verkefni. Sú staða getur því komið upp að skilanefndarmaður vinnur hjá lögfræðistofu sem veitir skilanefndinni lögfræðiráðgjöf. Dæmi um það kom upp í gær þegar DV sagði frá því að skilanefnd Landsbankans hafi falið Lögfræðistofu Reykjavíkur að annast innheimtu á láni Exista. Sveinn Andri Sveinsson, meðeigandi lögfræðistofunnar, vísaði allri gagnrýni um hugsanlegan hagsmunaárekstur í því máli á bug í viðtali við fréttastofu í gær. Sveinn Andri segir að Lárentsínus Kristjánsson, annar eigandi lögfræðistofunnar, hafi vikið sæti á fundi skilanefndar bankans þegar skilanefndin tók ákvörðun um að kaupa þjónustu af lögfræðistofunni. Hann hafi því ekki tekið þátt í þeirri ákvörðun.

Gylfi Magnússon, viðskiptaráðherra, sagði í samtali við fréttastofu í gær að skilanefndarmenn þurfi að fara varlega í því að taka ákvarðanir sem koma þeim eða skyldum aðilum vel. Hann segir að eftirlit sé með þessu af hálfu Fjármálaeftirlitsins.

Ljóst er að skilanefndirnar gæta verulegra fjárhagslegra hagsmuna og koma á vissan hátt að uppbyggingu íslensks efnahagslífs.