Arðgreiðslur HB Granda afar hófsamar

Stjórnarformaður og forstjóri HB Granda segja arðgreiðslur félagsins afar hófsamar. Þeir fagna að félagið hafi tekist að halda uppi fullri starfsemi.

Ákvörðun stjórnar félagsins um að leggja til við aðalfund félagsins að eigendum verði greiddar um 150 milljónir króna í arðgreiðslu hefur mætt andstöðu.

Móðgun við verkafólk

Tillagan hefur verið gagnrýnd í ljósi þess að almennir launamenn afsöluðu sér um 13 þúsund króna launhækkun til að koma til móts við atvinnurekendur í fjármálakreppunni. Arðgreiðslan sem stjórnin leggur til að eigendur fái í sinn vasa myndi nægja til þess að greiða öllu fiskverkunarfólki HB Granda þá launahækkun í átta ár.

Vilhjálmur Birgisson, formaður Verkalýðsfélags Akraness, sagði þetta örgustu móðgun við verkafólkið í fréttum Stöðvar 2 á föstudaginn.

Á alla mælikvarða hófsöm arðgreiðsla

Undanfarin ár hafa árlegar arðgreiðslur HB Granda numið 12% af nafnvirði hlutafjár, að fram kemur í yfirlýsingu frá Árna Vilhjálmssyni stjórnarformanni félagsins og Eggerti Benedikt Guðmundssyni. Það þyði að arður sem hlutfall af markaðsvirði hafi veirð á bilinu 1 til 1,5%.

,,Þetta telst á alla mælikvarða afar hófsöm arðgreiðsla, svo sem ljóst má vera ef litið er til vaxtakjara á bankainnistæðum og ríkisskuldabréfum. Samt sem áður hefur stjórn félagsins ákveðið að leggja til við aðalfund að arðgreiðsluhlutfallið lækki í 8% vegna ársins 2008. Þetta samsvarar 0,8% arði á útistandandi hlutafé, miðað við núverandi gengi 10."

Fullri vinnu haldið uppi

Árni og Eggert segja að lækkunin ráðist einkum af búsifjum vegna loðnuvertíðarbrests og af óvissu vegna umtalsverðra lækkana á verði nokkurra helstu afurða félagins.

,,Félagið fagnar því að hafa undanfarna mánuði getað haldið uppi fullri vinnu í fiskiðjuverum félagsins í Reykjavík og á Akranesi, enda er efnahagslífinu mikilvægast að starfandi fyrirtækjum sé haldið í stöðugum rekstri," segja Árni og Eggert í yfirlýsingunni.