Jóhannes í Bónus: Kaupþing mun ekki tapa krónu á 1998

Jóhannes Jónsson, sem einatt er kenndur við Bónus, segir það rangt að Kaupþing hafi tekið yfir 1998, móðurfélag Haga, líkt og fréttastofa greindi frá í hádeginu. Enn sé í gangi skriflegt samkomulag á milli Kaupþings og fjölskyldu Jóhannesar um málefni 1998.

Fréttastofa greindi frá því í hádegisfréttum að Samkeppniseftirlitið hefði til skoðunar samruna Kaupþings og 1998 vegna þess að bankinn væri að taka félagið yfir. Nýverið skipaði bankinn einnig tvo menn í stjórn félagsins og flutti heimili þess í höfuðstöðvar sínar í Borgartúni.

Jóhannes segir að fjölskyldan hafi ekki misst yfirráð sín yfir 1998. "Þetta ferli er unnið samkvæmt verklagsreglum sem bankinn hefur kynnt í fjölmiðlum. Við höfum enn fulla stjórn á félaginu," segir Jóhannes.

Töluvert hefur verið rætt um tugmilljarða afskriftir Kaupþings vegna málsins en Jóhannes vísar því öllu á bug.

"Kaupþing mun ekki tapa krónu á þessum viðskiptum. Æsingurinn vegna mögulegra afskrifta er algjörlega óþarfur þar sem þær eru ekki til staðar. Það væri óskandi að fjölmiðlar eins og Morgunblaðið myndu kanna betur málin áður en þeir halda af stað með fullyrðingar sem standast ekki skoðun," segir Jóhannes og bætir við að það myndi líka hjálpa til ef pólitíkin léti þetta mál í friði og leyfði bankamönnum að sjá um að hámarka virði eignanna.