Engin viðbrögð frá Framsókn varðandi mál Magnúsar

Engin viðbrögð hafa borist frá forystu Framsóknarflokksins varðandi mál Magnúsar Árna Skúlasonar, fulltrúa flokksins í bankaráði Seðlabankans. Þeir þingmenn sem fréttastofa náði tali af vildu ekki tjá sig um málið.

Í frétt Morgunblaðsins í dag kemur fram að Magnús Árni hafði samband við útflutningsfyrirtæki til að koma á viðskiptum með gjaldeyri í gegnum breskt miðlunarfyrirtæki. Það hefur það í för með sér að útflutningstekjur í erlendum gjaldmiðli skila sér ekki á gjaldeyrismarkað hér á landi. Seðlabankinn hafði áður beðið fyrirtækin um að láta af slíkum viðskiptum meðan gjaldeyrishöft eru í landinu.

Magnús Árni sagði í hádegisfréttum Ríkisúvarpssins að tilgangurinn hafi ekki verið að höndla með krónur. Hann íhugar að stefna Morgunblaðinu vegna fréttarinnar.

Þrátt fyrir ítrekaðar tilraunir hefur ekki náðst í Sigmund Davíð Gunnlaugsson formann flokksins sem er staddur erlendis, Birki Jón Jónsson varaformann né Gunnar Braga Sveinsson þingflokksformann framsóknarmanna vegna málsins. Auk þess hefur fréttastofa reynt án árangurs að ná í þingmennina Vigdísi Hauksdóttur, Eygló Harðardóttur og Höskuld Þórhallsson.

Aftur á móti náði fréttastofa tali af þingmönnunum Sigurður Ingi Jóhannssyni og Siv Friðleifsdóttur. Sigurður var staddur í réttum á Suðurlandi og Siv var í veiði á Norðurlandi. Hvorugt þeirra hafði séð frétt Morgunblaðsins eða heyrt af málinu. Þau vildu því ekki tjá sig um málið að svo stöddu.