Kreppan fer illa með geðheilsu Íslendinga

Íslendingar eru áberandi svartsýnni en aðrar þjóðir á efnahagsástandið á næstu mánuðum. Í júní síðastliðnum töldu 71% Íslendinga að efnahagsástandið myndi enn versna á næstu 3 mánuðum. Næst á eftir Íslendingum í svartsýni komu Þjóðverjar, en 46% þeirra töldu að efnahagsástandið færi versnandi. Þetta sýna niðurstöður stærstu alþjóðlegu könnunar um áhrif fjármálakreppunar á almenning sem WIN (alþjóðleg samtök óháðra markaðsrannsóknarfyrirtækja) stendur fyrir og gerir nú í þriðja sinn í 22 löndum.



Dregur úr svartsýni alls staðar nema á Íslandi og í Brasilíu

„Af könnuninni í heild sinni sést að í 20 löndum af 22 hefur dregið úr svartsýni þar sem töluvert færri nú töldu að efnahagsástandið myndi versna en fyrir 3 mánuðum. Flestir áttu von á því að efnahagsástandið myndi standa í stað. Ísland og Brasilía voru einu þátttökuþjóðirnar þar sem ekki fækkaði í hópi þeirra sem töldu að ástandið myndi versna," segir í tilkynningu frá Capacent Gallup vegna málsins.

Þá telja Íslendingar frekar en aðrar þjóðir að fjölskyldutekjur þeirra muni lækka á næstu mánuðum, en 59% töldu að þær myndu fara lækkandi og er það aukning frá 55% í síðustu könnun sem gerð var í mars síðastliðnum. Næstir koma Japanir, en um 49% þeirra telja að fjölskyldutekjur þeirra muni lækka. Hlutfall japanskra þáttakenda sem það telja hefur ekki hækkað, ólíkt því sem sést hér á landi.



Íslendingar upplifa streitu, kvíða og þunglyndi vegna kreppunnar

Jafnframt voru könnuð sálfræðileg áhrif kreppunnar og spurt um svefn, streitu, kvíða og depurð sem afleiðingu efnahagsástandins. Um 40% allra þátttakenda í löndunum 22 töldu sig hafa upplifað streitu eða kvíða vegna efnahagsástandsins og 18% að þeir hefðu fundið fyrir depurð. Um 67% Íslendinga höfðu upplifað að minnsta kosti eitt ofangreindra atriða, en á heildina litið höfðu 54% allra þátttakenda upplifað að minnsta kosti eitt atriði.

Niðurstöðurnar sem um er að ræða voru úr netkönnun sem Capacent Gallup gerði dagana 17 - 25. júní 2009. Í úrtakinu voru 1277 manns á öllu landinu, 16 ára og eldri og var svarhlutfall 60,6%