Vill sjá reglur um eignarhald fjölmiðla

„Það er talað um það í stjórnarsáttmálanum að endurskoða fjölmiðlalögin, en einungis nefnt sjálfstæði ritstjórna," segir Guðlaugur Þór Þórðarson, þingmaður Sjálfstæðisflokksins.

Hann hefur beint fyrirspurn til menntamálaráðherra um hvers vegna ekki sé gert ráð fyrir reglum um eignarhald fjölmiðla í stjórnarsáttmálanum, en fyrirspurnin er á dagskrá þingsins á morgun.

„Ég myndi telja að ef menn ætla í þessa vinnu þá myndu menn skoða þann þátt sérstaklega, og í ljósi alls þess sem á undan er gengið," segir Guðlaugur í samtali við fréttastofu.

En er þörf á að setja takmarkanir á eignarhald fjölmiðla?

„Mín skoðun hefur alltaf verið skýr að það eigi að vera markmið að fleiri segi okkur fréttir frekar en færri. Síðan er hægt að fara mismunandi leiðir að því, en það er ekki hjá því komist að skoða sérstaklega áhrif eignarhaldsins," segir Guðlaugur, sem finnst jafnframt mikilvægt að það sé gott mótvægi við ríkisfjölmiðla í landinu.

„Það er ekkert leyndarmál að ég ber frjálsa fjölmiðla fyrir brjósti," segir Guðlaugur að lokum.