Undirstrikar nauðsyn breikkun Suðurlandsvegar

Sigurður Ingi Jóhannsson, þingmaður Framsóknarflokksins, segir að svar Kristjáns Möllers, samgönguráðherra, við fyrirspurn sinni um Suðurlandsveg og gangagerð undirstriki nauðsyn þess að hafnar verði framkvæmdir við breikkun Suðurlandsvegar.

Í svari samgönguráðherra kemur meðal annars fram að arðsemismat vegna breikkunar Suðurlandsvegar sé á bilinu 16-28% samanborið við 2-15% arðsemi framkvæmda um Vaðlaheiði og Héðinfjörð.

„Það er klárt að arðsemismat þessarar framkvæmda er ákaflega hagfellt Suðurlandsvegi," segir Sigurður. Jafnframt segir hann að í svari Kristjáns komi fram að tíðni alvarlegra slysa sé afar há um Suðurlandsveg. Sigurður segir að það sama eigi þó við um Víkurskarð.

Á veginum um Víkurskarð við Vaðlaheiði er 0,89 slysatíðni en á Suðurlandsvegi er hún á bilinu 0,58-1,80.

„Ég mun halda áframa að þrýsta á að framkvæmdir hefjist við þessa mjög svo mikilvægu framkvæmd og að vegurinn verði tvöfaldaður eða í það minnsta breikkaður," segir þingmaðurinn.

Sigurður segir ekkert því til fyrirstöðu að hefja framkvæmdir strax. „Framkvæmdin hefur langhæsta arðsemismatið, mikin stuðning í samfélaginu og síðan er þetta einn hættulegasti vegur landsins."

Svar Kristjáns Möllers samgönguráðherra við fyrirspurn Sigurður Inga Jóhannssonar er hægt að sjá hér.