Nauðsynlegt að eyða óvissu í efnahagsaðgerðum stjórnarinnar

Greining Glitnis segir að nauðsynlegt sé að eyða óvissu í kringum efnahagsaðgerðir ríkisstjórnarinnar sem fyrst. Er þar átt við enn hefur ekki verið kynnt hvort fjármögnun þessara aðgerða muni fara fram með frekari útgáfu í íbúðabréfaflokkum sem nú þegar eru til staðar eða hvort að nýir flokkar verða gefnir út.

Þá liggur ekki enn fyrir hvort að þessar aðgerðir koma í stað þeirra breytinga sem boðaðar hafa verið á fyrirkomulagi Íbúðalánssjóðs með haustinu eða hvort þeim breytingum sé ætlað að samræmast þeim breytingum sem nú hafa verið tilkynntar.

Greining fjallar um málið í Morgunkorni sínu. Þar segir að þrátt fyrir framangreint séu aðgerðir stjórnvalda í heildina litið afar jákvæð tíðindi. Hinsvegar sé ekki hægt að horfa framhjá því að betur má ef duga skal.

„Þá leysa aðgerðirnar ekki stærsta vandann á gjaldeyrismarkaði sem er skortur á erlendum gjaldeyri en til þess að eðlilegt ástand megi komast á að nýju á gjaldmiðlaskiptamarkaði þarf að auka flæði erlends gjaldeyris," segir í Morgunkorninu

Til skemmri tíma litið má þó búast við að aðgerðirnar hafi jákvæð áhrif á markaði og bendir greiningin á að gengi krónunnar hafi styrkst í morgun.