Engar uppsagnir í bönkunum

„Engar fréttir eru góðar fréttir í þessu," segir Friðbert Traustason formaður félags íslenskra bankastarfsmanna þegar Vísir spyr hvort hann hafi heyrt af einhverjum fjöldauppsögnum hjá bönknum um þessi mánaðarmót. Friðbert segist ekkert hafa heyrt.

Skemmst er að minnast uppsagna hjá Glitni í síðasta mánuði en þá var 88 starfsmönnum sagt upp og eru það umfangsmestu uppsagnir í bankakerfinu.

Friðbert segir að þegar uppsagnir séu í bönkunum beri starfsmannahaldinu að láta félagið vita. „Þegar starfsmönnum er sagt upp hafa þeir líka oft samband við okkur," segir Friðbert sem hefur ekki heyrt frá neinum.

„Þetta er heldur ekki dæmigerður tími til uppsagna í þessum geira. Það er mikið um sumarfrí og það dekkar alveg júní, júlí og ágúst."