Íbúðalán banka 37% minni en á sama tíma í fyrra

Viðskiptabankarnir draga verulega úr lánum til íbúðarkaupa á milli ára. Miðað við fyrstu fjóra mánuði ársins í ár og sama tímabil í fyrra er ,,samdrátturinn ríflega 37 prósent" segir Kristrún Tinna Gunnarsdóttir hjá Greiningardeild Landsbankans.

Markaðshlutdeild Íbúðalánasjóðs eykst umtalsvert á milli ára. Fyrstu fjóra mánuði ársins lánaði sjóðurinn 80 prósent af heildarlánum til íbúðarkaupa en á sama tíma í fyrra var hlutfallið 56 prósent.

Í ár hafa Íbúðalánasjóður og bankarnir lánað 19 milljarða til íbúðarkaupa en fyrir ári síðan var upphæðin 34 milljarðar. Frá janúar til apríl í ár lánuðu bankarnir 3,8 milljarða til íbúðarkaupa en Íbúðalánasjóður 15,1 milljarða. Á sama tíma í fyrra var hlutur bankanna 15 milljarðar og Íbúðalánasjóðs 19 milljarðar.

Vextir hafa hækkað meira hjá bönkunum en hjá Íbúðalánasjóð sem veldur færslu á markaðashlutdeild. ,,Inn í þetta spila einnig spár um að fasteignarverð sé komið upp í topp og þá dregst saman áhugi fólks á að kaupa húsnæði. Þannig að það er samblanda af erfiðum markaðsástæðum sem hafa áhrif á að heildarlánin dragast saman í takt við minnkandi veltu á fasteignarmarkaði," segir Kristrún.