Nokkuð dregur úr viðskiptahallanum

Samkvæmt nýbirtum tölum Seðlabankans var viðskiptajöfnuður á 3. ársfjórðungi neikvæður um 109,6 milljarða kr. Er það nokkru minni halli en á öðrum fjórðungi ársins, en þá mældist viðskiptahallinn 128 milljarða kr., sem er mesti viðskiptahalli í einum fjórðungi frá því Seðlabankinn hóf að taka saman ársfjórðungslegar greiðslujafnaðartölur árið 1990.

Fjallað er um málið í Morgunkorni greiningar Glitnis. Þar segir að stærsti hluti viðskiptahallans skrifast á jöfnuð þáttatekna sem var neikvæður um 88 milljarða kr. Munar þar mestu um 130 milljarða kr. vaxtagjöld, en fimmtungs aukning varð í þeim lið á milli ársfjórðunga.

Á móti koma vaxtatekjur sem námu 55 milljarða kr. á tímabilinu. og höfðu vaxið um 15% frá fyrri ársfjórðungi. Hér þarf að raunar að taka í reikninginn að gengi krónu var að meðaltali 6% lægra á þriðja ársfjórðungi en á öðrum fjórðungi ársins.

Skoða má ofangreindar tölur sem svipmynd af endalokum tímabils. Viku eftir lok 3. ársfjórðungs voru neyðarlögin sett og hrun íslenska bankakerfisins varð staðreynd. Með því breyttust mikið ýmsar þær stærðir sem ráða miklu um þróun viðskiptajafnaðar. Til að mynda er ljóst að þáttatekjujöfnuður mun spila talsvert minna hlutverk næsta kastið en verið hefur undanfarin ár, og afgangur af vöru- og þjónustujöfnuði er tekinn við af miklum halla á undangengnum misserum.

Því er líklegt að tímar mikils viðskiptahalla séu að baki og að niðurstaðan verði nálægt núllinu, eða hugsanlega nokkur afgangur af utanríkisviðskiptum næstu árin.