Verðið á áltonninu að ná fyrra meti

Álverð hefur farið hækkandi undanfarið og náði í gær sínu hæsta gildi í rúma þrjá mánuði er verð á áltonninu fór upp í 3.169 Bandaríkjadali.

Greining Glitnis fjallar um álverðið í Morgunkorni sínu. Þar segir að verðið sé ekki fjarri núverandi meti sem slegið var í maí árið 2006 þegar tonnið kostaði 3.310 dali.

Ástæður hækkunar álverðs um þessar mundir eru annars vegar skortur á raforku, einkum í Kína, og hins vegar hækkandi olíuverð, en um þriðjungur til 45% af kostnaði við álbræðslu má rekja til þessara þátta. Álverð hefur hækkað um rúm 30% það sem af er þessu ári.