Krónan hefur veikst um 14 prósent í september

Það sem af er september hefur gengi krónunnar veikst um 14 prósent og hefur hún veikst á 13 af 17 viðskiptadögum mánaðarins.

Frá þessu er greint í hálffimmfréttum Kaupþings í tilefni þess að gengisvítitala krónunnar hefur aldrei verið hærri og gengi krónunnar því aldrei lægra. Veiking dagsins nemur 3,1 prósenti sem þýðir að gengi Bandaríkjadals er 94,6 krónur, evru 139,5 og punds 175,6 krónu.

Greiningardeild Kaupþings segir ekki liggja fyrir hvað valdi veikingu krónunnar. ,,Þó er óhætt að segja að afar fátt styðji við krónuna í augnablikinu. Á meðan óvissa ríkir um afleiðingar nýjustu aðgerða bandaríska seðlabankans má ætla að stöðutaka í krónunni muni minnka. Ljóst er að mikil áhættufælni á erlendum mörkuðum hefur komið sér illa fyrir hávaxtamyntir líkt og íslensku krónuna. Sömuleiðis hefur erfitt aðgengi viðskiptabankanna að erlendu lausafé komið mjög sterkt fram á gjaldmiðlaskiptamarkaði - þar sem ekki eru lengur krónuvextir í boði nema að litlu leyti," segir greiningardeildin.

Þetta endurspegli þó svipaða þróun og á mörgum öðrum gjaldeyrismörkuðum þar sem skortur á dollurum og evrum hafi verið mikill og álag hækkað mikið. ,,Seðlabankar hafa víða brugðist við vandanum með að bjóða bönkum upp á endurhverf viðskipti í annari mynt en heimagjaldmiðli. Skilvirkni gjaldeyrismarkaða hefur víða annars staðar batnað í kjölfarið," segir í hálffimmfréttum og bætt við að á meðan staðan sé svona sé afar erfitt fyrir útgefendur krónubréfa að framlengja eða gefa út ný bréf í stað þeirra sem eru nú á gjalddaga. Það setji lóíka þrýsting á krónuna.