Mikil auking veltu á gjaldeyrismarkaðinum

Velta á gjaldeyrismarkaði í maímánuði nam 505 milljörðum kr. samkvæmt tölum sem Seðlabankinn birti í gær. Í maí fyrir ári síðan var veltan 265 milljarðar kr. og hefur því aukist um rúmlega 90% á milli ára.

Greining Glitnis fjallar um málið í Morgunkorni sínu. Þar segir að veltan hafi dregist saman frá því í apríl en þá var veltan 845 milljarðar kr. Veltan hefur því dregist saman um 40% á milli mánaða.

Á fyrstu fimm mánuðum ársins var velta með gjaldeyri samtals 3.761 milljarðar kr. og hefur meira en tvöfaldast samanborið við sama tímabil fyrir ári síðan þegar veltan var 1.706 milljarðar kr.

Velta með gjaldeyri hefur verið að aukast hér á landi síðustu misserin. Heildarvelta með gjaldeyri á millibankamarkaði á síðasta ári var samtals 4.967 milljarðar kr. og hefur ársveltan ríflega fimmfaldast frá síðustu aldamótum.

Greining segir að ljóst sé að samhliða því sem þátttakendum á íslenskum gjaldeyrismarkaði fjölgar og tengslin við alþjóðlega gjaldeyrismarkaði aukast munu umsvif og dýpt gjaldeyrismarkaðarins vaxa líkt og endurspeglast í aukinni veltu á milli ára.