SPRON samþykkir samrunann við Kaupþing

Hluthafafundur SPRON samþykkti rétt í þessu samrunann við Kaupþing með ríflega 80% atkvæða. Talsverður hiti var á fundinum. Nú hefur enn einni hindruninni verið rutt úr vegi en bæði Fjármálaeftirlitið og Samkeppniseftirlitið eiga eftir að leggja blessun sína yfir samrunann.

,,Þetta eru skynsamleg skref miðað við núverandi aðstæður," sagði Guðmundur Hauksson, forstjóri SPRON, eftir fundinn og bætti við hann væri afar ánægður með að niðurstaða væri fengin í málið.

Samruninn var samþykktur með 2,94 milljarða atkvæða gegn 570 milljónum atkvæða. 3 milljónir atkvæða voru ýmist auð eða ógild.

Stjórnir félaganna samþykktu fyrr í sumar samrunaáætlun um að Kaupþing yfirtaki eignir og skuldir SPRON. Samruninn var háður samþykki hluthafafundar SPRON en hluthafar höfðu í fjölmiðlum að undanförnu lýst efasemdum um samrunann og það endurgjald sem þeir fá fyrir hlut sinn í SPRON.

Tíu hluthafar tóku til máls eftir að Guðmundur Hauksson, forstjóri sjóðssins, hafði lokið máli sínu og lýstu flestir yfir megnri óánægju með stjórnina og samrunaferlið. Einn hluthafa lagði til í umræðum á fundinum að verði sameiningin samþykkt yrðu óánægðir hluthafar að ráða sér lögfræðing og leita réttar síns fyrir dómstólum.

Mikill fjöldi manns sótti fundinn sem hófst klukkan 17 og fór fram á Hilton-hótelinu við Suðurlandsbraut.