Fjarstæða að ríkið sé að eignast verslanir Baugs

Engari viðræður eru í gangi um að íslenska ríkið komi til með að eignast hluti Baugs í nokkrum af þekktustu verslunarkeðjum Bretlands. Þetta segir Gunnar Sigurðsson, forstjóri Baugs, í samtali við Vísi.

Breska blaðið Financial Times greinir frá því í dag að þetta standi til og að áformað sé að breyta skuldum Baugs við ríkisbankana í hlutafé í eigu ríkisins. Gunnar bendir hins vegar á að skuldir Baugs séu við gömlu bankana sem séu ekki í ríkiseigu heldur í eigu kröfuhafa og gömlu eigendanna.

„Það er algjör fjarstæða að verið sé að ræða um það að íslenska ríkið sé að fara að eignast hlut í þessum félögum," segir Gunnar.

„Skuldir Baugs eru við gömlu bankana sem eru ekki í eigu ríkisins heldur kröfuhafa og gömlu eigendanna. Við erum að vinna að endurskipulagningu á Baugi með bönkunum og það gengur út á að búa til vettvang þar sem hægt er að hámarka virði eignasafn Baugs sem mun þá tryggja að bankarnir þurfa ekki að afskrifa neinar skuldir," segir Gunnar Sigurðsson, forstjóri Baugs.